საქართველოს სტრატეგიული ანალიზის ცენტრმა, ნატოს ფინანსური ხელშეწყობით დაიწყო ახალი პროექტის განხორციელება. პროექტის ფარგლებში ტრეინინგები ჩაუტარდებათ სხვადასხვა მედია საშუალებების ჟურნალისტებს.
კურსი ორი ძირითადი ეტაპისგან შედგება: პირველი ეტაპის განმავლობაში მონაწილეები გაეცნობიან ნატოს, მის მისიას, ოპერაციებს და საქართველოს ძალისხმევას ამ ორგანიზაციაში გაწევრიანებისთვის;
მეორე ნაწილში მედიის წარმომადგენლები გაივლიან პრაქტიკულ წვრთნას, რომლის მიზანიც არის მათი ჟურნალისტური უნარ-ჩვევების განვითარება.
მომზადდება სიუჟეტები ნატოს თემატიკაზე, სადაც გამოყენებული იქნება კურსის პირველ ნაწილში შეძენილი ცოდნა და ორიენტირებული იქნება გამოკვეთილ პრიორიტეტებსა და გამოწვევებზე.
5 დეკემბერს ნატოს სამეკავშირეო ოფისში, მისმა ხელმძღვანელმა, როზარია პუგლისმა, პროგრამის მონაწილეებს უმასპინძლა და ესაუბრა ნატოსა და საქართველოს ურთიერთობებზე, ქართული მედიის როლზე ჩვენი საზოგადოების სწორად ინფორმირებაში, ასევე უპასუხა მათ შეკითხვებს.