საქართველოს სტრატეგიული ანალიზის ცენტრი (GSAC), რომელიც 2016 წლიდან ღირსეულად ემსახურება საქართველოს ევრო-ატლანტიკურ მისწრაფებებს, კატეგორიულად გმობს ქართული ოცნების მიერ გაკეთებულ განცხადებას, რომელიც პირდაპირ უპირისპირდება საქართველოს კონსტიტუციის 78-ე მუხლს და ქართველი ხალხის ისტორიულ არჩევანს.
ეს განცხადება არა მხოლოდ უგულებელყოფს ჩვენი ქვეყნის დემოკრატიულ განვითარებას, არამედ მიზნად ისახავს საქართველოს ევროპული გზის მოშლას — იმ გზის, რომელიც ჩვენი წინაპრების ბრძოლითა და თავგანწირვით მოპოვებული თავისუფლებისკენ მიგვიძღვის.
საქართველოს ევროპული მომავალი არ არის მხოლოდ პოლიტიკური არჩევანი — ეს არის ქართველი ხალხის ისტორიული მისია, თავისუფალი, ძლიერი და განვითარებული ქვეყნის აშენება. ვერანაირი პროპაგანდა, ვერანაირი უღირსი სიტყვა და ვერანაირი მუქარა ვერ შეარყევს ჩვენი ხალხის ნებას და ძალას.
საქართველო იყო, არის და მუდამ იქნება ევროპის ნაწილი! ქართველი ხალხის ნება არ დაემორჩილება მათ, ვინც ცდილობს ჩვენი ქვეყნის თავისუფლება და დამოუკიდებლობა ხელყოს.
ჩვენ, როგორც ორგანიზაცია, ასევე მისი წევრები, როგორც საქართველოს რიგითი მოქალაქეები, ვდგავართ ქართველ ხალხთან ერთად, ამ სამართლიან ბრძოლაში.
საქართველოს სტრატეგიული ანალიზის ცენტრი (GSAC), ვაცხადებთ, რომ ჩვენი ბრძოლა საქართველოს ევროპული მომავლისთვის კიდევ უფრო გაძლიერდება. თითოეული მოქალაქის, თითოეული ხმამაღალი სიტყვისა და თითოეული გადადგმული ნაბიჯის ძალით, ჩვენ დავიცავთ ჩვენი ქვეყნის მომავალს და დავამტკიცებთ, რომ საქართველო არასოდეს შეუშინდება ბრძოლას თავისი ღირსების, თავისუფლებისა და ევროპული მომავლისთვის.
საქართველოს გზა — ეს არის ევროპის გზა. ეს გზა ნათელია, მართალია და შეუქცევადი!
