გიორგი (გიგი) წერეთელი

გიგი წერეთელი ერთ -ერთი ყველაზე გამოცდილი პოლიტიკოსი და საზოგადო მოღვაწეა, როგორც საქართველოში, ისე მის ფარგლებს გარეთ. მისი საქმიანობა მოიცავს სახელმწიფო, საერთაშორისო, ასევე კერძო სექტორებს.

გიგი წერეთელი იყო ევროპის უსაფრთხოებისა და თანამშრომლობის ორგანიზაციის (ეუთო) საპარლამენტო ასამბლეის პრეზიდენტი 2017-2020 წლებში. ის იყო ყველაზე გრძელვადიანი ლიდერი ამ ორგანიზაციის ისტორიაში. მანამდე, გიგი იმავე ასამბლეის ვიცე -პრეზიდენტი იყო ხუთი წლის განმავლობაში. ის წლების განმავლობაში ასამბლეაზე ქართულ დელეგაციას ხელმძღვანელობდა.

გიგი წერეთელი იყო უმსხვილესი “ევროპის სახალხო პარტიის” (EPP) ფრაქციის ლიდერი, რომელიც უპრეცედენტო შემთხვევაა არა მხოლოდ საქართველოსთვის, არამედ მთელი აღმოსავლეთ ევროპისთვის.

გიგი წერეთელს 1995 წლიდან 2016 წლამდე ეკავა სხვადასხვა წამყვანი თანამდებობები როგორც ადგილობრივ, ასევე ცენტრალურ ხელისუფლებაში: იყო თბილისის ვიცე-მერი, თბილისის საკრებულოს ფრაქციის თავმჯდომარე; რეგიონული პოლიტიკისა და თვითმმართველობის კომიტეტის თავმჯდომარე; ჯანმრთელობისა და სოციალური დაცვის კომიტეტის თავმჯდომარე; ამასთან ერთად, იგი ორი ვადით  პარლამენტის თავმჯდომარის მოადგილედ მოღვაწეობდა.

გიგი წერეთელს ეკავა საქართველოს ვიცე პრემიერის, ისევე, როგორც შრომის, ჯანმრთელობისა და სოციალური დაცვის მინისტრის პოზიციები.

უნდა აღინიშნოს, რომ 2011-2013 წლებში იგი აირჩიეს „მოსახლეობისა და განვითარების ევროპული საპარლამენტო ფორუმის“ (EPF) პრეზიდენტად, ხოლო მანამდე- ამ ფორუმის ვიცე-პრეზიდენტად.

გიგი წერეთელი პროფესიით ექიმი-ნევროლოგი და ადვოკატია. დაამთავრა თბილისის სამედიცინო უნივერსიტეტის მედიცინის ფაკულტეტი და სახელმწიფო უნივერსიტეტის იურიდიული ფაკულტეტი. მას ასევე მიენიჭა ბოსტონის უნივერსიტეტის სერთიფიკატი- “ჯანმრთელობის საერთაშორისო ეკონომიკა და ფინანსების” განხრით.

გიგი წერეთელს მიენიჭა უმაღლესი ჯილდო – წმ. გიორგის ორდენი მნიშვნელოვანი წვლილისთვის სახელმწიფოს განვითარებაში.